我: 哇! 阿娘你生暗瘡呀! 做乜咁青春呀你?

娘: 生暗瘡係由於你夜瞓, d夜火谷起佢, 又食埋晒d熱野攪成咁囉

我: 你知就好啦! 咁你就唔好食咁多米通, 熱氣呀!

娘: 咩呀! 我講緊你咋, 我果d係因為我老得滯生出黎架

我: 老的滯又關生喑瘡咩野事?

娘: 老得滯d血氣唔好咪會生喑瘡囉!

我: .......................

*************************************************

話說, 過年果陣, 娘親忙住整野拜神, 我又唔係好理佢, 就係佢同我講開阿姨是非嘅時候:

娘: 你阿姨呀, 同你表妹, 兩個都係一擔擔, 兩個都係姿姿悠悠咁, 呢d都係遺傳架

我: 關遺傳乜野事, 又唔好見細表妹係咁

娘: 凡事都有例外嘛! 唔同你講啦, 我好忙好多野做, 你又幫唔到我手(娘親話我唔識做佢d野, 我做得唔啱佢心水), 點解我生d女個個都咁懶

我: 呢d好明顥係遺傳架啦!

娘: 關乜野事, 你地懶就懶啦! 係度賴遺傳

我: ..................

起身攬住娘親拜年逗利是

我: 拜個年先, 祝你身體健康, 今年賺多d, 最緊要係我賺多d俾多d你

娘: 哈哈哈(笑完一輪), 好呀! 咁等你賺多d俾多d我啦!

娘: 拿! 俾封利是你, 今年呢封大呀! 我未試過俾咁大封架

我: 點解今年俾咁大封嘅? 因為今年開心d?

娘: 因為今年有錢左~

我: ............................

黃豆浸左一晚, 發大左成倍

打爛佢

加水煲滾

加冰糖同薑片......加左薑片無咁寒, 不過無咁好味我覺得

滾左之後小心滾瀉, 如果唔係.....除左個爐有排抹之外, 仲有心臟病發嘅危險, 因為.....

個煲有豆渣, 好易滾瀉, 於是我就搬左張櫈坐係個爐前面睇住佢滾.  係就黎滾嘅時候, 娘親好八咁走左入廚房睇我點整, 佢問得兩問我傾得兩傾, 係毫無先兆之下, 娘親係度大叫...... 果下我真係俾佢嚇到成個跳起...... 原來佢見到個煲滾瀉...... 真係俾佢嚇到命都短幾年

我: "俾你嚇鬼死我, 無端端咁大聲叫都無用架, 拎起個蓋未得囉!"

娘: "你坐係度阻住晒, 我隻手唔夠長嘛! 嚇親咁你食唔食救心丹呀?"

我: "你估我係你咩食救心丹, 有無保嬰丹呀咁?"

娘: "保嬰丹呀? 無播! 得救心丹咋, 你食唔食呀?"

我: "......... 我仲未駛食救心丹呀嘛? 你當我七老八十?"

娘: "咁你喳丫嘛"

我: "............ 無野啦! 總之我末整好之前你唔好再入黎就得啦!"

跟住, 娘親走左去午睡

就係瀉到咁嘅樣, d渣煲乾左攪到我抹左好耐......

煲到d糖溶晒, 試味, ok嘅話就可以隔渣

隔好渣之後再煲滾就飲得啦!

娘親 : "心月馨扎"? (讀緊盒上面嘅字)

老豆 : 係"心月馨礼"呀!

我  : 老豆果然係識字多過你

娘親 : 哈哈哈....(係咁笑), 係丫

我 : ......................

其實佢地兩個咪又係讀左兩年書, 不過娘親讀埋晒d古代神話("成語考"果d古文), 老豆睇埋晒d小說(佢睇文言文嘅西遊記.......我屋企仲有成套......都唔知佢係咪真係睇得明)

仲有好耐之前, 娘親講過....

娘 : 你老豆牙, 後生果陣都好靚仔架!

我 : 係咩? 點解我一d都唔覺嘅? 佢家下成個曹達華咁樣(係老左嘅曹達華)

姐 : 佢地果個年代興d咁嘅樣嘛!

我 : 真係?

老實講, 我真係點睇(老豆後生d相)都唔覺得佢靚仔.

我: 咁即係點呀?

娘: 咁即係肥囉!

我: 咁剝左皮咪唔肥囉!

娘: 煮豉油雞無皮唔好, 你地食果陣先剝啦! 不過你話唔好咋! 我好想用雞油黎煮"倭"瓜

我: 哇! 你估你仲十八廿二咩? 你唔受得架家陣!

娘: 車! D人乜都唔食咪又係呢樣果樣

我: 張枱果D咩黎? 木糠咁樣嘅?

娘: 哦! D粟米片D粉啫! (起身抺)

我: 哇! 你條褲做咩呀? 你著底腰褲咁潮?

娘: 咩呀! 我無縳實條帶之嘛! 咁咪跌左落黎囉!

我: 係啦係啦! 你無著底腰褲~~

娘: ...................

娘 : 你得果幾條頭髮, 駛乜成日整呀!

我 : 就係得果幾條先至成日整呀嘛! 整反直唔駛煩

娘 : 整反直咪好囉, 好過家下個頭整到成隻箭豬咁

我 : 咁我咪一隻大箭豬囉! 你以前又夠整到個頭成棵椰菜花咁囉!

娘 : 以前興椰菜花咁丫嘛!

我 : 家下夠興箭豬囉!

娘 : 廢事理你咁多 (走左去)

我 : ...................

娘 : 又買左d乜野呀!

我 : 你好鐘意嘅野

娘 : 我好鐘意? 咩野黎呀?

我 : (攞出黎)咪筍囉!

娘 : 我邊有好鐘意唧! 你放好佢啦! 用黎炒野都應該唔錯......炒呢樣同果樣(唔記得佢講乜)都好喎! 就咁食都好味呀!

我 : 你仲話唔係好鐘意? 一見到就係度諗點食.

娘 : 你買果隻朱古力, 無上次食果隻咁好味喎! 你試下(試圖轉開話題)

我 : (攞黎食, 順手俾左舊老豆)我唔覺得喎! 都係同一隻牌子, 同一隻味, 不過包裝唔同咋嘛!

娘 : 咁可能上次我肚餓啦! 上次食明明好香奶味, 係圓型架!

我 : 老豆! 你覺唔覺得有分別呀?

老豆 : 我咪又係咁食, 唔知喎!

娘 : 佢點會食得出丫! 咁我食野係有少少"厭沾"嘅!

我 : 你何止少少呀! 你係好"厭沾"呀!

娘 : 哈哈! 都唔係呀!

我 : ................................

娘 : 哇! 做乜電個爆炸頭丫?

我 : 唔係呀!幾型丫!

娘 : 電到好似卡通片果d咁!

我 : 乜卡通片係咁架咩? 你睇d乜野卡通片呀?

娘 : 果d日本打交果d卡通片呀! 我得閒有時都睇下架!

我 : 乜野日本打交果d卡通片呀?????乜家下d卡通片咁架咩? 仲有, 你家下連卡通片都睇牙?

娘 : 得閒開電視見到咪睇下囉! 我係唔識講返出黎啫! 我知道架!

幾日後

我 : 娘親話我個頭似日本打交果d卡通片咁喎!

姐 : 勁呀! 佢講緊龍珠呀嘛?!

我 : ........................................

娘 : 乜你條裙著到好以八婆咁! 好師奶喎!

我 : 係咩? 但我好鐘意喎! 幾好睇丫!

娘 : 不如你借俾家姐著丫!

我 : 吓? 咁你即係話家姐係八婆師奶姐?

娘 : 咁佢係師奶丫嘛!

我 : .................

娘 : 呀! 指天椒即係指天椒, 真係指向天架喎! 又幾得意

我 : 都有名俾你叫啦! 有幾得意呀?

娘 : 唔係dd辣椒都咁樣架, 人地向下架嘛!

我 : 向下?! 乜辣椒向下生架咩? (註 : 我娘親細個果陣屋企係農民)

娘 : 呢! 大大隻果d綠色果d呢!(仲做埋手勢嚟形容)

我 : 唔好玩啦! 咁大隻燈籠椒點可能指上天呀!

娘 : 嗱!嫖賭飲盪吹呢! 都係賭無咁差。因為嫖會野到病俾人, 飲醉會亂性, 吹呢就偽君子.......

我 : 吓?! 娘親你係咪攪錯左呢? 呢度吹係解吸毒喎! 唔係解吹水呀! 吸毒果d係癮君子, 吹水果d先係偽君子呀!

娘 : 哈哈.....我講錯左之嘛......

俾佢激死

返到屋企, 我娘親坐左係度睇電視, 我就順手俾左袋好立克俾佢, 同佢講係母親節禮物, 諗住睇下佢有咩野反應。跟住:

娘親 : 吓! 買左嗱? (註 : 佢之前問過我D筍係邊度買)

我 : 唔係筍黎架! D筍唔係度度有得賣架! 我去開果度先幫你買啦!

(註 : 我娘親超鐘意食筍)

娘親 : 哦! 我唔係吹你, 你去開先買啦!

我 : 但係你頭先睇都未睇袋野, 你就流晒口水啦喎!

娘親 : 無呀! (扮唔知)

由於開晒門同窗(我屋企好多窗), 所以一邊撇雨一邊吹開左度門

娘親 : 你做乜吹開左度門唔閂呀!

老豆 : 咁我熱丫嘛! (死撐)

娘親 : 咁熱你唔坐出門口!!!!

老豆 : ............................

(閱讀全文)

(閱讀全文)